Punjab BJP ਦਫ਼ਤਰ 'ਤੇ Grenade ਹਮਲਾ: ਚਾਰਜਸ਼ੀਟ ਵਿੱਚ Foreign Funding ਦਾ ਖ਼ੁਲਾਸਾ, ਪੁਰਤਗਾਲ-ਫ਼ਰਾਂਸ-ਜਰਮਨੀ ਤੋਂ ਰਚੀ ਗਈ ਅੱਤਵਾਦੀ ਸਾਜ਼ਿਸ਼

ਚੰਡੀਗੜ੍ਹ: ਸੈਕਟਰ-37 ਸਥਿਤ ਪੰਜਾਬ ਭਾਜਪਾ ਦਫ਼ਤਰ 'ਤੇ ਇੱਕ ਅਪ੍ਰੈਲ ਨੂੰ ਹੋਏ ਗ੍ਰਨੇਡ ਹਮਲੇ ਦੇ ਮਾਮਲੇ ਵਿੱਚ ਚੰਡੀਗੜ੍ਹ ਪੁਲਿਸ ਦੀ ਚਾਰਜਸ਼ੀਟ ਵਿੱਚ ਅੱਤਵਾਦੀ ਸਾਜ਼ਿਸ਼ ਅਤੇ ਵਿਦੇਸ਼ੀ ਫੰਡਿੰਗ ਦਾ ਪਰਦਾਫ਼ਾਸ਼ ਹੋਇਆ ਹੈ। ਚਾਰਜਸ਼ੀਟ ਮੁਤਾਬਕ ਪੁਰਤਗਾਲ, ਜਰਮਨੀ ਅਤੇ ਫ਼ਰਾਂਸ ਵਿੱਚ ਬੈਠੇ ਵਿਦੇਸ਼ੀ ਹੈਂਡਲਰਾਂ ਨੇ ਇਸ ਹਮਲੇ ਲਈ ਲਗਭਗ ਡੇਢ ਲੱਖ ਰੁਪਏ ਵੱਖ-ਵੱਖ ਕਿਸ਼ਤਾਂ ਵਿੱਚ ਭੇਜੇ ਸਨ। ਹਾਲਾਂਕਿ, ਹਮਲਾ ਕਰਨ ਵਾਲੇ ਗੁਰਤੇਜ ਉਰਫ਼ ਤੇਜੀ ਅਤੇ ਅਮਨਪ੍ਰੀਤ ਸਿੰਘ ਉਰਫ਼ ਅਮਨ ਦੇ ਹਿੱਸੇ ਤਾਂ ਮਹਿਜ਼ ਪੰਜ-ਪੰਜ ਹਜ਼ਾਰ ਰੁਪਏ ਹੀ ਆਏ ਸਨ। ਇਹ ਰਕਮ ਵੀ ਉਨ੍ਹਾਂ ਨੂੰ ਹਮਲੇ ਦੇ ਅਗਲੇ ਦਿਨ ਮਿਲੀ ਸੀ।

ਹਮਲਾਵਰਾਂ ਨੂੰ ਮਿਲੇ ਸਨ 10 ਹਜ਼ਾਰ ਰੁਪਏ

ਨਵਦੀਪ ਸਿੰਘ ਨਾਂ ਦੇ ਵਿਅਕਤੀ ਨੇ ਫ਼ਰਾਂਸ ਤੋਂ ਕਿਸੇ ਔਜਲਾ ਦੇ ਕਹਿਣ 'ਤੇ ਦੋ ਅਪ੍ਰੈਲ ਨੂੰ ਅਮਨਪ੍ਰੀਤ ਸਿੰਘ ਦੇ ਬੈਂਕ ਆਫ਼ ਬੜੌਦਾ ਦੇ ਖਾਤੇ ਵਿੱਚ 10 ਹਜ਼ਾਰ ਰੁਪਏ ਭੇਜੇ ਸਨ। ਫਿਰ ਉਸ ਨੇ ATM ਤੋਂ ਪੰਜ ਹਜ਼ਾਰ ਰੁਪਏ ਕੱਢਵਾ ਕੇ ਆਪਣੇ ਸਾਥੀ ਗੁਰਤੇਜ ਉਰਫ਼ ਤੇਜੀ ਨੂੰ ਦੇ ਦਿੱਤੇ ਸਨ। ਇਸ ਤੋਂ ਪਹਿਲਾਂ ਤੇਜੀ ਨੇ ਅਮਨਪ੍ਰੀਤ ਦੇ UPI ਸਕੈਨਰ ਦੀ ਫ਼ੋਟੋ ਖਿੱਚ ਕੇ ਜ਼ਾਂਗੀ ਐਪ (Zangi App) 'ਤੇ ਕਿਸੇ ਨੂੰ ਭੇਜੀ ਸੀ। ਹਮਲੇ ਦੇ ਅਗਲੇ ਦਿਨ ਤੇਜੀ ਅਤੇ ਅਮਨਪ੍ਰੀਤ ਨੂੰ ਪਤਾ ਲੱਗਿਆ ਸੀ ਕਿ ਉਨ੍ਹਾਂ ਦੀ ਫ਼ੋਟੋ ਇੰਟਰਨੈੱਟ ਮੀਡੀਆ (ਸੋਸ਼ਲ ਮੀਡੀਆ) 'ਤੇ ਵਾਇਰਲ ਹੋ ਗਈ ਹੈ। ਉਸ ਤੋਂ ਬਾਅਦ ਉਹ ਡਰ ਕੇ ਖਾਟੂ ਸ਼ਿਆਮ ਪਹੁੰਚੇ ਅਤੇ ਫਿਰ ਰੇਵਾੜੀ ਆ ਗਏ ਜਿੱਥੇ ਉਨ੍ਹਾਂ ਨੂੰ ਪੁਲਿਸ ਨੇ ਫੜ ਲਿਆ ਸੀ। ਉਨ੍ਹਾਂ ਦੇ ਫੜੇ ਜਾਣ ਤੋਂ ਬਾਅਦ ਪੁਲਿਸ ਨੂੰ ਇਸ ਮਾਮਲੇ ਵਿੱਚ ਅੱਤਵਾਦੀ ਸਾਜ਼ਿਸ਼ ਅਤੇ ਵਿਦੇਸ਼ੀ ਫੰਡਿੰਗ ਦਾ ਪਤਾ ਲੱਗਿਆ ਸੀ।

ਫ਼ਰਾਂਸ ਤੋਂ ਸੁਰਜੀਤ ਉਰਫ਼ ਸਰਪੰਚ ਨੇ ਭੇਜੇ ਸਨ 1.42 ਲੱਖ ਰੁਪਏ ਚਾਰਜਸ਼ੀਟ ਮੁਤਾਬਕ, ਫ਼ਰਾਂਸ ਵਿੱਚ ਬੈਠੇ ਸੁਰਜੀਤ ਉਰਫ਼ ਸਰਪੰਚ ਨੇ ਇਸ ਅੱਤਵਾਦੀ ਸਾਜ਼ਿਸ਼ ਲਈ ਵੱਖ-ਵੱਖ ਖਾਤਿਆਂ ਵਿੱਚ 1.42 ਲੱਖ ਰੁਪਏ ਟ੍ਰਾਂਸਫ਼ਰ ਕੀਤੇ ਸਨ। ਉਸ ਨੇ 31 ਅਕਤੂਬਰ 2025 ਨੂੰ ਇਕਬਾਲ ਸਿੰਘ ਦੇ ਖਾਤੇ ਵਿੱਚ 60 ਹਜ਼ਾਰ ਰੁਪਏ ਭੇਜੇ। ਫਿਰ 19 ਦਸੰਬਰ 2025 ਨੂੰ ਹਜਨਬੀਰ ਸਿੰਘ ਨੂੰ 10 ਹਜ਼ਾਰ ਰੁਪਏ, 19 ਮਾਰਚ 2026 ਨੂੰ 30,922 ਰੁਪਏ ਅਤੇ ਉਸੇ ਦਿਨ 10 ਹਜ਼ਾਰ ਰੁਪਏ ਦੀ ਇੱਕ ਹੋਰ ਰਾਸ਼ੀ ਭੇਜੀ। 23 ਮਾਰਚ 2026 ਨੂੰ ਜਸਵੀਰ ਸਿੰਘ ਦੇ ਖਾਤੇ ਵਿੱਚ 10,301 ਰੁਪਏ ਅਤੇ 26 ਮਾਰਚ ਨੂੰ ਹਜਨਬੀਰ ਸਿੰਘ ਨੂੰ 21,070 ਰੁਪਏ ਭੇਜੇ ਗਏ। ਜਾਂਚ ਏਜੰਸੀ ਮੁਤਾਬਕ, ਹਮਲੇ ਦੀ ਪੂਰੀ ਸਾਜ਼ਿਸ਼ ਪੁਰਤਗਾਲ ਵਿੱਚ ਬੈਠੇ ਬਲਜੋਤ ਸਿੰਘ ਉਰਫ਼ ਜੋਤਾ ਨੇ ਰਚੀ ਸੀ। ਫ਼ਰਾਂਸ ਤੋਂ ਸੁਰਜੀਤ ਉਰਫ਼ ਸਰਪੰਚ ਅਤੇ ਜਰਮਨੀ ਵਿੱਚ ਬੈਠੇ ਔਜਲਾ ਨੇ ਵੀ ਸਾਜ਼ਿਸ਼ ਵਿੱਚ ਜੋਤਾ ਦਾ ਸਾਥ ਦਿੱਤਾ।